خلينا نعتبر انو اليوم يوم أربعاء... طالع حضرتك من محاضرة أو من شغل أو من نوم.. مين بتشوف؟ حبيب القلب أبو شريك شيخ الشباب الغالي أبو سمير... طبعا بتاخدو مباوسة.. وبوسة عالكتف.. وعلى كيفك وكيف أخبارك طمني عنك شو عم تشتغل وإلى أخره.. بلحظة من لحظات اللقاء الحميمي المرتقب بدن يخلصو التراحيب.. ويبلشو الأحاديث.. هون بقا المشكلة. بدي من كل مواطن سوري عم يقرأ هالموضوع انو ما بقا يفتح الأحاديث التالية.. عنجد.. أرجوكم.. أتوسل لمشاعر ضمير مخكن.. من بعد اذنكن لا بقا:
- تحكوني عن "عقد نقصكن": اذا كنت شب عمرك بين ال16 و ال25 فيرجح انك بتسمع باليوم الواحد ما معدله 89 مسبة و 22 معلومة عن بنت ما.. الشي اللي بيتقاطع عند 13 مسبة عبنت ما.. المسبة هنا هيي عبارة عن كلمة زغيرة تتكون من شي ست حروف.. ما بعرف ليش لهلق –وصرنا بالقرن ال23- ما عرفو يجيبو مسبة تانية.. وكأنو الشي الوحيد اللي ممكن يكون غلط بأي بنت هوي هالشي... الموضوع هون هوي بكل بساطة انو اللي ما بطال الحصرم بقول عنو عنب (*) ... وكن على ثقة انو وحياة حياة ما عندي مانع اسمع تفاصيل من هالنوع.. المانع هون هوي الاحتقار المصاحب لهالبنت.. أنا هنا بكل تأكيد ما عم حاسب.. وما بعرف اذا تحرر مني بس ما كتير بهمني موضوع "السمعة"... بعتبرو تحرر يا أخي.. بعتبرو مخ نضيف... أنا الغلط وانتو الصح.. بس بلاه هالحديث.. احكي عن شي وحدة ما بعرفها.. وخود راحتك.. ما حدا بكون عم ينضر بهالحالة.. بس اذا بعرفها.. فخلي هالمعلومات لنفسك.. لأنو ما بدي دافع عن البنت واطلع أنا الجحش متل كل مرة.
- تحكوني بالدين: بين كل فترة وفترة.. وما بعرف اذا بس أنا أو غيري كمان.. بجيك واحد حاطط نصب عينيه انو يهديك ويهدي ربك إلى الصراط المستقيم.. هلق قبل ما بلش بهدلة بدي بس ذكر اني كتير بشكر هالشخص كونو اهتم بما يكفي.. بس شيل المزح عجنب.. لا بقا تحاول تهديني كرمال كل ما تسير من الهة. يا خيي أنا حالة ميئوس منها.. أنا الله ذات نفسو فقد الأمل فيي.. اذا فكرك انو انت زلمي مؤمن جدا و فيك بالوقت الكافي وبالجهد الكافي تهديني وبالتالي تاخد شي ست سبع نقط عسجل الحسنات تبعك وتبع اللي خلفك... أرجوك تصدقني لما بقلك انو بالوقت الكافي وبالجهد الكافي في احتمال أكبر اني كفرك من أنك تأومنني... فكرمال كل ما هو مقدس عندك يا خيي.. استغني عن هالكم نقطة برصيدك.. معلش بلاهن.. وفكر يعني اذا بتحسب مقدار الصلوات اللي حضرتك صرت مصليها و بتضربها بعدد الركعات و بتجمعلها 200 مضروبة بكل يوم صمت فيه ونقصت منها عدد المرات اللي لعبت فيها بوكر.. بيطلعلك شقة دوبلكس بالجنة.. لا يا سيدي و بضللك مع الله كمان.. بقا ارضى يا أخي.. أصلا بهالوقت اللي بدك تحاول فيه تهديني كنت صليتلك تلات أربع مرات.. احسبها أربحلك؟
- تحكيني عن "شو كنت لازم أعمل": ليك ببساطة و اختصار.. اذا شفتني غلطت.. لا تصححلي يا أخي..خليني متل الأهبل اغلط مرة ثانية وثالثة... لأنو انت شكلك ما زلت مقتنع انو النصيحة بجمل.. ولي كم مرة بحياتك شايف جمل؟.. من وين برأيك بدي بضلك جمل أنا مثلا؟.. عكل حال يا خيي.. جمل ما في... ونصيحتك بعد ما صار اللي صار صارت متل قلتها... يعني بشرفك تجي تقللي بعد ما كون ساحبها نومة ومتأخر عالحصة اني كان لازم ما أتأخر؟ انو برأيك ما بعرف هالمعلومة؟.. يعني فكرك اني منضم لجماعة سرية هدفها السيطرة على العالم و وسيلتها الوحيدة التأخر عن الحصص؟.. ليك من هلق... اذا كتير بدك الجمل تبعك فوالله بكسر الواو.. مستعد اذا بدك جبلك جمل عن كل نصيحة *ما* بتعطيني أياها.
- تحكيني عن قديش حضرتك لامبالي: ما بعرف اذا حدا غيري لاحظ الموجة اللي عم تعصف بأرض وجو المجتمع السوري... موجة "اللامبالاة"... ومو اللامبالاة تبع اللاانتماء تبع كولن ولسون... على العكس تماما.. اللامبالاة اللي عم احكي عنها هيي اللامبالاة بهدف "الكولنة"... كل شي عم شوفو بالفترة الأخيرة صاير "كئيب" , "روحاني", "بيكره الحياة" و عندو اياها عبارة عن "استعارة" شو ما كان هالشي بيعني... ليش؟.. مجرد تكملة لعقد النقص الاخرى... يعني بدك تقنعني انك مسبل شعرك بهدف انك تعبر عن كون حياتك جحيم ولي؟.. لك بالمصاري اللي دفعتا كرمال تسبلو لشعرك كنت أنا عشت ملك شي اسبوع... يعني مجرد انك عم "تعبر" ولو انو بطريقة ما الا علاقة باللياقة عن كونك كئيب.. ما عاد فيني صدق انك كئيب.. يا حبيبي لو كنت كئيب ماكنت قلت لحدا.. لأنو لو كنت كئيب وقلت للعالم اي بتكتئب بزيادة... أصلا السبب الرئيسي للكابة هوي هالعالم يا حيوان... واذا مصر أنك كئيب روح انتحر من بعد اذنك يعني... بكون كتير منيح لكتير ناس... ودخلك اذا بتعرفلك تلات أربع أغاني لأناثيما؟.. شو يعني بتكون أخدت التصريح الرسمي من وكالة الشؤون التكئيبية والاصلاح؟.. شوف أنا ما أحلاني بسمع كل شي في أغاني انتحارية و وحياة شرفي برَنِّخ(**) عليها.. يعني بتوقع وصلت الفكرة.. ولا ما وصلت؟... الخلاصة لا تكتئب عديني... ما عدا في حال قررت تنتحر بطريقة مثيرة للأهتمام.. وقتها يفضل تدعيني للمشاهدة.
الموضوع هون موجه للشباب الذكور من أصدقائي.. بس ما بيمنع نوجه رجاء للاناث... طبعا الرجاء هون أصغر بكتير.. بتمنى بس انو تحكو اللي بدكن أياه.. فيكن حتى تحكو اللي الشغلات اللي فوق.. والسبب هوي انو عالأغلب ما رح كون عم اسمع.. واذا سمعت ما رح افهم شي... بس انتو احكو شو بدكن
-----------------------------------------------------------
منقول بتصرف (*)
أنبسط بشدة (**)
